Вигвам

Вигвам или викап е вид на куполен шатор што некогаш го користеле домородните жители на Американскиот континент. Денес сè уште се користи за церемонијални цели и во домородниот американски фолклор. Терминот викап обично се користи за вакви типови на шатори во југозападните и западните делови на северноамериканскиот континент, додека терминот вигвам обично се користи во североисточниот дел на континентот. Вету е пак термин за вигвам на племето Вампаноаг. Овие термини може да се однесуваат на многу различни типови на домородни американски шатори без оглед на локацијата или културната група.

Апачки вигвам

Вигвам на Дакота Индијанци

Вигвам на Пајута Индијанци

Структура

Вигвамот се користел како засолниште кај бројни домородни американски култури. Заоблените површини го прават идеално засолниште за секакви услови. Структурите се прават од рамка на заоблени држачи, најчесто дрвени, кои се покриени со некој вид покривен материјал. Деталите за изградбата варираат во зависност од културата и локалната достапност на материјалите. Некои од материјалите што се користат за покриви вклучуваат трева, трска, кожи или ткаенини. Мажите ги граделе вигвамите, а жените ги поставувале покривките.

Вигвамите најчесто биле сезонски структури, иако терминот се применува на заоблени и конусни структури изградени од домородните американски групи кои биле исто така трајни по природа. Нивниот животен век обично траел подолго од оној на типите и нивните рамки обично не се така мобилни како на типите.

Типичен вигвам на североистокот имал заоблена површина која можела да ги издржи најлошите временски услови. Скелетот бил направен од свиткани млади зелени стебла од речиси сите видови дрва, долги десет до петнаесет метри. Додека дрвата од скелетот биле виткани, на земјата се исцртувал круг за нивно поставување. Дијаметарот на кругот варирал од десет до шеснаесет метри. Свитканите дрвја потоа биле поставени над нацртаниот круг, користејќи ги највисоките дрвја во средината и пократките однадвор. По формирањето на основниот скелет околу вигвамот биле редени нов ред на стапови. Откако овие две структури биле поврзани се поставувале страните и кровот. Страните на вигвамите обично биле кора од дрво. За поставување на вигвамот биле одговорни машките членови на семејството.

Терминот вигвам останал во употреба во говорниот англиски јазик како синоним за која било „индијанска куќа“; сепак, оваа употреба е неточна бидејќи постојат добро познати разлики помеѓу вигвамите и типите во индијанските заедници.

За време на Американската револуција, британските војници го користеле терминот вигвам за да опишат широк спектар на импровизирани структури.

Надворешни врски

• Chiricahua wickiup (слика) (англиски)
• Изработка на викап (вклучувајќи слики) (англиски)
• Цртање на викап (англиски)
• Како да се изгради вигвам (англиски)
• Вигвам конструкција (англиски)