Кебир Мехмед Челеби
Кебир Мехмед Челеби (турски: Kebir Mehmed Çelebi) — старо скопско маало.
Местоположба уреди
Ова некогашно големо скопско маало се протегало од левата страна на реката Вардар. Западно од него се наоѓале маалота Ибни Коџаџик и Хаџи Таџедин, северно било маалото Хаџи Касим, додека пак источно биле маалата Искендер Гази и Хаџи Лала. Од Камениот мост било оддалечено само 700 метри.
Историја уреди
Според опширните османлиски дефтери за населението на Скопската Каза од 1832/33 година, маалото било муслиманско, со неколку христијански домаќинства. Имало 85 муслимански и 7 христијански домаќинства. На овој попис биле забележани 175 мажи муслимани, со 18 новороденчиња, како и 11 мажи христијани со едно новороденче. Исто така имало и 34 мажи муслимани и 6 мажи христијани, коишто скоро се доселиле. Се проценува дека маалото во тој период имало 490 жители, што го правело едно од поголемите скопски маала.[1][2]
Во рамките на маалото се наоѓала и истоимената џамија.
Сегашност уреди
Денес голем дел од ова маало е урбанизирано, а единствен остаток од некогашното маало е џамијата Кебир Мехмед Челеби. Други институции коишто се наоѓаат тука денес се: МАНУ, МКЦ, МРТ, МВР (одделение за управни работи), како и дел од Филозофски Факултет.
Наводи уреди
- ↑ Османлиски документи за историјата на Македонија - пописи од XIX век на муслиманското население - Скопски Санџак, каза Скопје. Скопје: д-р Емил Крстески. 2020.
- ↑ Османлиски документи за историјата на Македонија - пописи од XIX век на христијанското население - Скопски Санџак, каза Скопје. Скопје: д-р Емил Крстески. 2021.