Туркање со раце

Туркање со раце (англиски: Arm wrestling) или ракоборба — спорт во кој двајца натпреварувачи (се викаат ракоборци) се обидуваат еден кон друг да си ги турнат рацете на некоја површина. Тоа е испитување за сила, техника и издржливост. Спортот е едноставен за играње: секој играч си ја става едната рака на површина (обично маса) со свиткани лакти и цврста положба. Потоа се фаќаат за рака, а целта е да ја турнат раката на противникот кон масата за да победат.

Туркање со раце

Натревар по туркање со раце против Кристијан Панковски (лево) и Бунјамин Лаху (десно) од 2022 г.

Историја

Туркањето со раце, еден од најстарите познати спортови, доживеал заживување во САД во 1950-тите. Во септември 1962 г., првото светско првенство во туркање со раце, како што првично било наречено, се одржало во Петалума, Калифорнија. Овој настан го означил почетокот на организираното натпреварување во спортот.

Правила на ракоборбата

• Секој натпревар во ракоборба е надгледуван од двајца судии, по еден на секоја страна, за да можат внимателно да ги следат ракоборците и нивниот стисок од двата агли.
• Нема временско ограничување за натпревар, но судијата може да го прекине ако мисли дека еден или двајцата ракоборци не можат безбедно да продолжат.
• Ракоборците се приближуваат до масата, прават да им е удобно, а потоа се фаќаат за рацете. Фатот треба да биде од дланка до дланка со покажување на палецот. Другата рака ја држат на рачка од страната на масата. Ракоборците можат да изберат да започнат во стисокот на судијата или со ремен, ако и двајцата се согласат.
• Откако судиите ќе се задоволат со стисоците на двата ракоборци, натпреварот започнува. Секој ракоборец се обидува да ја турне раката на својот противник на подлогата. Притисокот треба да биде страничен за да се турне раката на противникот надолу на подлогата. Повлекување на противничката рака наназад кон средината на масата не е дозволено.
• Ракоборецот победува кога ќе ја турне раката на противникот на подлогата. Главниот судија ќе извика „Стоп!“ и ќе ја крене раката за да го означи победникот доколку потврдат дека положбата била полноважна. Положбата е полноважна кога целиот зглоб на ракоборецот ја допира сопствената подлога.
• Постојат неколку начини да се направи фаул во туркање со раце. Тие вклучуваат допирање на сопственото тело за време на натпреварот, преминување кон страната на противникот, спуштање на рамото под подлогата (односно масата), пцовки или покажување слаб спортски дух.
• Две опомени се еднакви на еден фаул, а два фаули водат до исклучување, што му дава на противникот миговна победа.

Професионална ракоборба

Туркањето со раце прераснало во организиран спорт, со национални и меѓународни турнири. Организации како Светската лига за ракоборба (WAL) и Меѓународната федерација за ракоборба (IFAW) одржуваат настани што привлекуваат натпреварувачи од целиот свет. Натпреварите се категоризираат според тежинска категорија и ниво на искуство.

Ракоборбата во Македонија

Ракоборбата има сѐ поголемо присуство во Македонија, каде што сѐ повеќе се препознава како организиран спорт. Месните клубови и љубители често одржуваат натпревари, често привлекувајќи учесници од целата земја. Најпознат македонски клуб е Битолскиот клуб за ракоборба основан во 2022 г. Македонските спортисти почнале да се натпреваруваат на меѓународни турнири стекнувајќи драгоцено искуство и признанија. Овој спорт привлекол особен интерес кај помладите спортисти, со програми за обука сосредоточени на сила, техника и издржливост од страна на Македонската федерација за ракоборба.

Надворешни врски

• Македонска федерација за ракоборба — официјална Фејсбук-страница на Македонската федерација за ракоборба

• Битолски клуб за ракоборба — официјален Инстаграм-профил на Битолскиот клуб за ракоборба.
• Светска федерација за ракоборба