Кенткаус II

Кенткаус II (2475 п.н.е. - 2445 п.н.е.) била кралска жена која живеела во Стариот Египет. Таа била сопруга на египетскиот крал Нефериркаре Какаи од Петтата династија, и мајка на двајца кралеви, Неферефре и Ниусере Ини.

Кенткаус II на престолот, од Националниот музеј во Прага

Животопис

Кенткаус II била сопруга на Нефериркаре Какаи. Нејзиниот пирамидален комплекс започнал да се гради за време на владеењето на нејзиниот сопруг, кога нејзината титула сè уште била кралска сопруга (hmt nswt). Изградбата на нејзиниот гроб била запрена, можеби кога нејзиниот сопруг починал, а подоцна продолжила и за време на владеењето на нејзиниот син. По изградбата, нејзината титула била мајка на кралот (mwt nswt). Кенткаус II е прикажана на блок со нејзиниот сопруг Нефериркаре и синот по име Ранефер (Б).

Фрагмент од варовник бил пронајден во пирамидалниот комплекс, во кој се споменува кралската ќерка Репутнебти, по која е запишан кралскиот син Кентикаухор. Од содржината се разбира дека Репутнебти била ќерка на Ниусере, а со тоа и внука на Кенткаус II. Се споменува уште еден кралски син Иренре Помладиот (nedjes).

Гроб

Пирамидалниот комплекс на Нефериркаре Какаи и помалиот комплекс на неговата сопруга Кенткаус II

Кенткаус II имала пирамидален комплекс во Абусир, до комплексот на нејзиниот сопруг Нефериркаре Какаи. Пирамидата првично била ископана во 1906 година од страна на Борхарт. За структурата тогаш се мислело дека е двојна мастаба и не била ископана многу темелно. Седумдесет години подоцна, чешкиот институт спровел темелно ископување на локацијата. Изградбата на пирамидата најверојатно започнала за време на владеењето на нејзиниот сопруг Нефериркаре Какаи и завршила за време на владеењето на нејзиниот син Ниусере Ини. Пирамидата била ограбена за време на Првиот преоден период. За време на Средното Кралство пирамидата била повторно отворена и саркофагот повторно бил искористен за погребување на мало дете. До крајот на Новото Кралство местото било уништено кога камењата биле земени од местото за повторно користење на друго место.

Погребниот храм на Кенткаус II бил украсен, но релјефот бил оштетен, и она што останало се збирка фрагменти. Сцените вклучуваа претстави на жртви, погребен оброк, земјоделски сцени, погребна поворка и семејството на кралот Ниусере што ја поздравува неговата мајка.