Бојан Маричиќ

Бојан Маричиќ е роден на 7 јануари 1983 година, во Скопје. Во 2006 година, дипломирал на Правен факултет „Јустинијан I“ - Скопје, отсек меѓународни односи. Како стипендист на МТЕК програмата на Кралството Холандија, во 2009 година, Маричиќ магистрирал по Меѓународно и европско право на Универзитетот во Амстердам, додека пак во 2011 година, како стипендист на Чивнинг програмата на Министерството за надворешни работи на Обединетото кралство, Маричиќ магистрирал по Современи европски студии на Универзитетски колеџ (Оксфорд).

Маричиќ бил демонстратор на Правен факултет „Јустинијан I“ - Скопје речиси две години, од ноември 2006 година до септември 2008 година.

Во меѓувреме, од февруари 2007 година до август 2008 година, Маричиќ работел во Секторот за правни и кадровски работи на Министерството за внатрешни работи на Република Македонија, како проектен асистент на проект за приближување на европското законодавство.

Во периодот септември 2009 - септември 2010 година, Маричиќ бил проектен координатор и аналитичар во правната програма, програмата за јавна администрација и ЕУ програмите во Фондацијата отворено општество – Македонија.

Од септември 2011 до ноември 2013 година, Маричиќ ја продолжува својата кариера во Евротинк - Центар за европски стратегии, најпрвин како Виш истражувач за правни и политички прашања, а од номври 2013 година до јуни 2017 година, како извршен директор на оваа невладина организација.

Од јуни 2017 година до јануари 2020 година, Маричиќ работел како Посебен советник за евроатлантски интеграции на Претседателот на Владата на Република Северна Македонија, Зоран Заев. Паралелно, Маричиќ е назначен и за Национален шерпас за Берлинскиот процес, а од јули 2018 година, тој е именуван и за Заменик на главниот технички преговарач, Главен технички преговарач и  Шеф на техничкиот преговарачки тим за пристапување на Република Северна Македонија кон Европската унија.

Од јануари 2020 година до септември 2020 година, во Владата на Република Северна Македонија, Маричиќ е назначен за Национален координатор за интеграција во Европската Унија, Берлински процес и регионална соработка.[1]

Почнувајќи од 31 август 2020 година, Бојан Маричиќ ја врши функцијата министер за правда во Владата на Република Северна Македонија.

  1. „Бојан Маричиќ“. Влада на Република Северна Македонија. 2020-08-31. Посетено на 2020-11-16.