Нинџа-желки (ТВ-серија од 1987)

Нинџа-желки (англиски: Teenage Mutant Ninja Turtles) — измислени ликови на четири антропоморфни желки, Леонардо, Рафаело, Микеланџело и Донатело. Нивниот учител Сплинтер, ги тренира и оспособува на нинџа-вештини, така што секоја желка ракува со посебно оружје. Најчесто како нивни непријатели се јавуваат Секачот, Кранг, Бибоп, Рокстеди, а како нивниот најблизок пријател и соработник во речиси сите емитувања е новинарката Ејприл О’Нил.

Историја

Младите мутанти нинџа-желки водат потекло од американскиот стрип, кој го издал Мираж Стјудиос во 1984 година. Концептот настанал од хумористичните скици, кои ги нацртал Кевин Истман со својот пријател Питер Лердом. Со сопствени пари младите уметници самите го издаваат првиот број на стрипови како пародија на четирите најпопуларни стрипови во почетокот на 1980-тите: „Дердевил“ и „Нови мутанти“, од Марвел Комикс, „Серебус“ од Дејв Сим и „Ронин“ од Френк Милер.

Филмски остварувања

Анимирани филмови:

Снимени се повеќе телевизиски проекти, од кои првата анимирана серија Млади мутанти нинџа-желки се создава и емитува 9 години и тоа од 1987 до 1996 година. Содржи вкупно 193 епизоди во 10 сезони.

Емитување на втората анимирана истоимена серија започнува на 8 февруари 2003 година. Особините на Нинџа-желките се изменети во однос на серијата од 1987 година, со цел да бидат доближени до оригиналните ликови од стриповите. Во овој серијал, повеќе е нагласена акцијата и борбата со злото во однос на претходната верзија, каде застапени се и хумористични моменти. Вкупно епитувани се 159 епизоди, распоредени во 7 сезони.

Третиот анимиран филм со нова верзија за Нинџа-желки се емитува од 2012 до 2017 година. Содржи 124 епизоди во 5 сезони.  

Играни филмови:

Нинџа-желките се појавуваат и во шест играни филмови. Првите три дела се настанати во почетокот на 1990-тите години, односно во 1990, 1991 и 1993 година. Четвртиот филм насловен како „ТМНТ“ е објавен во 2007 година. Најновите филмски остварувања се двата дела на филмот насловен како „Млади мутанти Нинџа-желки“ во режија на Џонатан Либесман, а во продукција на Мајкл Беј. Првиот дел е објавен на 8 август 2014, додека неговото продолжение беше објавено на 3 јуни 2016 година.  

Анимирана серија „Млади мутанти нинџа-желки 1987 — 1996“

Млади мутанти нинџа-желки (англиски: Teenage Mutant Ninja Turtles) e американска цртана серија продуцирана од фирмата Murakami-Wolf-Swenson Film Productions Inc. Американската премиера ја имала на 10 декември 1987 година. Создадени се 193 епизоди, кои овозможиле овие ликови да стекнат огромна популарност. Серијата се заснова врз истоимениот стрип на Кевин Истман и Питер Лерд, иако темите значително се разликуваат од релативно мрачните мотиви од стрипот за пред сè, да бидат погодни и за децата.

Содржина

Во Јапонија постои клан нинџи под називот Стапало, кои ги предводи чесниот учител Хамато Јоши. Поради подмолноста на еден од неговите ученици — Ороку Саки — Јоши е посрамотен и протеран од кланот, иселувајќи во Њујорк каде што во очај и беда почнува да живее во канализација. Еден ден, непознато дете кое носи аквариум со четири желки случајно се сопнува, ги испушта желките, кои паѓаат во канализацијата кај Јоши. По некое време, Јоши ги наоѓа желките покриени со светлосна розова смеса, мутантна хемикалија со која поради контактот со Јоши ги претвора во човечки желки, додека Хамато Јоши поради тоа што непосредно пред тоа бил во контакт со стаорци, станува човечки стаорец, именувајќи се со ново име Сплинтер. Јоши ги прифаќа четирите желки како свои синови и ги учи на нинџа-вештини. Им дава имиња по своите омилени ренесансни уметници: Леонардо, Рафаело, Михеланџело и Донатело. Секоја нинџа носи марама со одредена боја и умее да ракува со одредено оружје.  

Набргу желките ја запознаваат Ејприл О’Нил – новинарка на Канал 6, кои ја спасуваат од група насилници. Дознаваат дека насилниците работат за злобниот Секач, кој е всушност стариот непријател на Јоши, неговиот ученик Ороку Саки. Секачот ги открива желките и Сплинтер дознавајќи дека тој е одговорен за нивната мутација. Имено, Саки (кој подоцна станува водач на кланот Стапало) го следел Јоши до Њујорк, па и него и желките ги изложил на мутација, која претвора луѓе во животни и обратно, со кои непосредно пред тоа биле во контакт.    

Во меѓувреме Секач соработува со злобниот тиранин Кранг, протеран од Димензија Икс и го обезбедува Секачот со врвна технологија и арсенал на оружје, кој се наоѓа во нивната база – Технодром. За возврат, Секачот му направил на Кранг андроитско тело и му помага во неговите различни проекти поврзани со инвазија на светот.  

Осознавајќи ја оваа вистина, желките постануваат херои, со постојани акции трајно спречувајќи го Секачот да ги оствари своите планови.

Ликови

Нинџа-желки:

• Леонардо – Неофицијален водач на тимот. Храбар, одлучен и особено посветен на боречките вештини. Најблизок со Сплинтер од сите останати и има мошне изразено чувство за чест и правда. Носи сина марама и неговото оружје е катана. Името го добива по Леонардо да Винчи.
• Рафаело -  Бунтовен член, а понекогаш и агресивен по природа. Голем шегаџија, но и полн со сарказам и ароганција. Понекогаш е лут на Леонардо поради неговата позиција. Носи црвена марама, а неговото оружје е саи. Името го добива по Рафаело Санти.
• Микеланџело – Најнезрелиот и најнесериозниот член во екипата. Има особено голем апетит за пица и најмногу се истакнува по својот слободен дух. Иако сака да се одмара, исто така има и авантуристичка и креативна страна. Користи доста сленгови во неговиот говор. Носи портокалова боја, а неговото оружје е нончаки. Името го добива по Микеланџело Буонароти.
• Донатело – Брилијантен научник, пронаоѓач, инженер и технолошки гениј. Од сите желки најмногу одбегнува насилство со тоа што сака да го користи својот интелект за решавање на конфликтот. Носи виолетова марама и негово оружје е бо-стап. Името го добива по вајарот Донатело.

Останати:

• Сплинтер — Роден како Хамато Јоши, строг и мудар учител. Мутиран стаорец, кој им е учител на желките во боречки нинџа-вештини.
• Ејприл О'Нил — Црвенокоса репортерка на Канал 6 и најдобар пријател на желките. Учесник во многу авантури на желките и често им помага во нивните борбени акции.
• Секач -—Главен антагонист во серијата и најголемиот непријател на желките, чие негово вистинско име му е Ороку Саки. Носи костим покриен со метални канџи, плашт, метален шлем и маска. Во ретки прилики го открива своето лице. Нинџа-мајстор и водач на кланот Стапало.
• Кранг — Мозок без тело, злобник протеран од Димензија Икс. Кранг обично работи во големо роботско тело и управува со контролите во торзото.
• Бибоп и Рокстеди — Некогаш обични градски криминалци, додека Секачот не ги мутира и претвори во дива свиња и носорог, со што ги ангажира како негови главни помошници. Глупави и речиси секогаш неспособни за борба против желките.
• Нинџа-Стапало — Војска од нинџи под водство на Секачот.
• Кејси Џонс — Правдољубив одмаздник, кој станува еден од најблиски сојузници на желките. Кејси се бори против криминалот носејќи хокејска маска да го заштити својот идентитет и е наоружан со спорска хокејска опрема.
• Ирма — Вработена во Канал 6 и најдобра пријателка на Ејприл. Ирма е опседната со мажи, но исто така станува и пријател на желките.
• Вернон — Репортер во канал 6 и главен соработник на Ејприл. Претставен е како суетна и себична кукавица.
• Берн Томпсон — Главен уредник на Канал 6 и шеф на Ејприл, Ирма и Вернон.
• Бакстер Стокман — Луд научник кој соработува со Секачот, сè додека не го претвори во мува и оттогаш станува самостоен негативец.
• Зак — Дете кое ги сака желките и посакува да биде Нинџа-желка. Желките често го нарекуваат Петта нинџа-желка.
• Кралот на стаорците — Негативец кој живее во канализација и поседува способност да комуницира со стаорци, претставувајќи се како нивен господар.

Останати Нинџа Желки серии

Серија	Година
Ninja Turtles: The Next Mutation	1997-1998
Teenage Mutant Ninja Turtles	2003-2009
Teenage Mutant Ninja Turtles	2012-2017
Rise of the Teenage Mutant Ninja Turtles	2018-2020
Tales of the Teenage Mutant Ninja Turtles	2024-

Анимирани и играни филмови

Филм	Година	Режисер
Teenage Mutant Ninja Turtles	1990	Стив Барон
Teenage Mutant Ninja Turtles II: The Secret of the Ooze	1991	Мајкл Пресман
Teenage Mutant Ninja Turtles III	1993	Стјуарт Џилард
TMNT	2007	Кевин Мунро
Turtles Forever (ТВ филм)	2009	Рој Бурдин,Лојд Голдфајн
Teenage Mutant Ninja Turtles	2014	Џонатан Либесман
Half-Shell Heroes: Blast to the Past ( ТВ филм)	2015	Глен Мураками
Teenage Mutant Ninja Turtles: Out of the Shadows	2016	Дејв Грин
Rise of the Teenage Mutant Ninja Turtles: The Movie	2022	Ant Ward, Andy Suriano
Teenage Mutant Ninja Turtles: Mutant Mayhem	2023	Jeff Rowe
Teenage Mutant Ninja Turtles: Mutant Mayhem 2	2026	Jeff Rowe
Teenage Mutant Ninja Turtles: The Last Ronin	TBA