Насмевка (филм од 2022)

Насмевка (англиски: Smile) — американски психолошки филм на ужасите од 2022 г. во режија и сценарио на Паркер Фин, кој е негов дебитантски игран филм. Сценариото е засновано на краткиот филм на Фин, Лора не спиеше. Главните улоги ги толкуваат Соси Бејкон, Кајл Галнер, Џеси Т. Ашер и Кал Пен.

„Насмевка (филм од 2022)“
Плакатот на македонски
Режисер	Паркер Фин
Продуцент	Марти Боуен Вик Годфри Исак Клауснер Роберт Салерно
Сценарист	Паркер Фин
Главни улоги	Соси Бејкон Џеси Т. Ашер Кајл Галнер Кал Пен Роб Морган
Музика	Кристобал Тапија де Вир
Кинематографија	Чарли Сароф
Монтажа	Елиот Гринберг
Студио	Paramount Players Temple Hill Entertainment
Дистрибутер	Paramount Pictures
Премиера	22 септември 2022 (Fantastic Fest) 30 септември 2022 (САД)
Времетраење	115 минути
Земја	САД
Јазик	англиски + македонски (титла)
Буџет	17 милиони долари
Бруто заработка	217,4 милиони долари
Следен	Насмевка 2

Содржина

Во психијатриското одделение во болницата, д-р Роуз Котер се среќава со студентката Лора Вивер, која била сведок на самоубиството на нејзиниот професор неколку дена претходно. Лора тврди дека ја прогонува суштество во облик на насмеани луѓе. Лора тогаш почнува хистерично да вреска и добива напад. Роуз повикува помош, по што ја гледа Лора како стои и се смешка, која се убива со фрагмент од скршена саксија. Тогаш Роуз го забележува својот пациент Карл како се смешка и вреска дека ќе умре. Роуз ги повикува медицинските сестри да го задржат Карл, но одеднаш открива дека тој спие сево ова време. Шефот на Роуз, д-р Морган Десаи, е загрижен за нејзината психичка состојба и ја става на еднонеделно платено отсуство.

Во следните денови, натприродни настани продолжуваат да ѝ се случуваат на Роуз, што доведува до влошување на нејзиниот однос со нејзиниот свршеник Тревор и сестрата Холи. На забава, Роуз ги плаши децата давајќи му ја на својот внук својата мртва мачка, која исчезнала претходната вечер, наместо воз играчка за неговиот роденден. Роуз потоа здогледува насмеана девојка и се струполува на стаклената маса, завршувајќи ја забавата во збрка. Таа ја посетува д-р Медлин Норткот, нејзината поранешна терапевтка. Медлин предлага дека проблемите на Роуз се поврзани со нејзината душевно болна мајка, чија смрт ја видела како дете. Роуз се сомнева дека е проколната од суштеството, но не може да го натера Тревор да ѝ поверува.

Откако дознала дека професорот на Лора ѝ се насмеал во мигот на неговата смрт, Роуз ја посетува неговата вдовица Викторија, која тврди дека нејзиниот сопруг почнал да се однесува поинаку откако бил сведок на самоубиството на жената. Роуз подоцна го посетува своето поранешно момче Џоел, полицаец што ја истражува смртта на Лора. Гледајќи низ полициските досиеја, тие откриваат низа самоубиства, од кои сите имале сведок што бил пренесен на проклетството. Роуз доаѓа кај Холи, обидувајќи се да ја објасни ситуацијата, но емотивно се распаѓа, а нејзината сестра ја брка. Суштеството потоа ја плаши Роуз земајќи го обликот на Холи. Џоел открива дека сите жртви умреле во рок од една недела, со исклучок на сметководителот Роберт Тели, кој е во затвор за убиство на човек. Роуз и Џоел го посетуваат Тели во затвор, каде што тој објаснува дека единствениот начин да се скрши синџирот е да се убие некого пред сведок за да се нанесе тешка психолошка траума врз нив. Роуз го отфрла овој избор и заминува.

Подоцна, суштеството под маската на д-р Норткот ја напаѓа Роуз во нејзиниот дом за време на импровизирана терапија, велејќи ѝ дека „речиси е време“. Роуз патува во болницата со нож, каде има халуцинација во која го убива Карл пред Морган за да му ја пренесе клетвата. Роуз доаѓа при себе и заминува, но не пред да пристигне Десаи и да забележи нож во нејзиниот автомобил и да ја извести полицијата. Планирајќи да го лиши суштеството од сведоци, Роуз оди во напуштениот семеен дом додека Џоел се обидува да ја пронајде. Во куќата, Роуз се соочува со суштество што го добило обликот на нејзината мртва мајка. Во претходно сеќавање, излегува дека Роуз не ѝ помогнала на мајка си, а со тоа ја испровоцирала нејзината смрт од предозирање. Роуз го пали суштеството со гасна светилка, убивајќи го и завршувајќи го проклетството додека куќата гори. Таа го посетува Џоел, но наскоро сфаќа дека суштеството го добива неговиот облик. Бегајќи, Роуз сфаќа дека сè уште е во старата куќа — сè што се случило од мигот кога влегла таму било халуцинација. Во паника, Роуз се заклучува во куќата. Суштеството во облик на нејзината мајка си го откинува лицето, откривајќи го неговиот вистински облик — суштество без кожа со вгнездени вилици — и потоа продира во Роуз. Џоел ја удира вратата и ја здогледува насмеаната Роуз како се полева со гориво од светилка. Џоел со ужас гледа како таа се самозапалува, пренесувајќи му го проклетството.