Моцета

Моцета (италијански јазик: mocetta) е ладно предјадење кое традиционално се консумира во Западните Алпи. Моцета е препознаен како PAT производ од Италијанската Република.

Моцета

Моцета се произведува низ долината Аоста, како и во северниот дел на Пиемонт (имено во Канавезе, Валсесија и Вал д'Осола). Предјадењето се подготвува од немрсни парчиња месо, главно мускули или бут. Месото може да биде говедско, овчо, козјо, свинско или дивеч, а од дивечот особено се цени дивокозата.

Подготовка

Месото се зачинува со лук, ловоров лист, рузмарин, жалфија и други планински билки (во зависност од рецептот), а потоа се посолува и се маринира во сопствените сокови. Откако ќе се маринира, месото се остава да отстои на ладно место одредено време: во случај на домашна Моцета, месото се ароматизира до 20 дена. Во занаетчиските месарници, месото се масира со машини за да се одржи хомогената боја и да се зачуваат ароматичните ноти. Без оглед на начинот на подготовка, месото потоа мора да се исуши и да созрее закачено на воздух во сува просторија.

Потрошувачка

Моцета може да се јаде во различните фази на созревањето. Помладата Моцета се вели дека е посвежа и помека, а посозреаната моцета станува потврда, и месото е со потемна боја. Моцета традиционално се сече на тенки парчиња.

Вкусот на моцетата се подобрува со комбинирање со мед, како и со масло од орев.

Потеклото на ова предјадење е древно и произлегува од потребата на селските семејства да го зачуваат месото во долгите зимски месеци на Алпите.

Библиографија

• Ouvrage collectif. éd. Musumeci (уред.). À la découverte des produits valdôtains. De la tradition aux DOP et aux DOC. Quart. стр. 40–41. (reference)

Надворешни врски

• Официјална интернет страница на долината Аоста (на француски)