Фото сојуз на Македонија

Фото сојуз на Македонија (кратенка: ФСМ) — еден од водечките сојузи за уметничка фотографија во Македонија. Членството во Сојузот е достапно преку фото-клубови или како независен автор.

Историја и придонес

Основан е во 1946 година како Фото-кино сојуз на Македонија, дел од организацијата „Народна Техника“. Првичната цел била унапредување на фотографијата и филмот, како и развој на фотографската и кино техниката. Во 1970-тите години, Фото сојузот се одделил како независна организација поради порастот на бројот на фото клубови. Од 1995 година, ФСМ е оперативен член на Меѓународната федерација за уметничка фотографија (ФИАП).

ФСМ одигра значајна улога во трансформацијата на фотографијата во Македонија од техничка дисциплина во призната уметничка форма. Преку своите членови и клубови, ФСМ има значајни успеси на меѓународни изложби под FIAP патронат.

Годишни активности

Една од главните активности на ФСМ е годишната изложба - натпревар наречена „Денови на македонската фотографија“. Овој настан ги собира членовите на ФСМ од целата земја, кои ги презентираат своите најдобри дела и се натпреваруваат за признанија и награди.

Членство и бенефиции

Членството е отворено за фото-клубови, фото-групи, или независни автори. Членовите добиваат пристап до:

• Меѓународни изложби и конкурси,
• Можност за добивање меѓународни и национални звања,
• Учество на семинари и обуки,
• Користење на ресурси на Сојузот.

Секој член има обврска да го почитува Статутот на ФСМ и да придонесува за развој на фотографијата во својата средина.

Звања во ФСМ

Фото сојузот на Македонија ги доделува следните видови на звања:

• Почесни звања (почесен член на ФСМ и почесен член на фото-клубот)
• Заслужни звања (заслужен член на ФСМ и заслужен член на фото-клубот)
• Стручни звања (Инструктор во ФСМ)
• Изложувачки звања (Фотограф III класа во ФСМ; Фотограф II класа во ФСМ; Фотограф I класа во ФСМ; Кандидат мајстор на фотографијата во ФСМ и Мајстор на фотографија во ФСМ (МФ ФСМ)

Овие звања се доделуваат на членовите на ФСМ за постигнати резултати значајни во работата на ФСМ, за работа на стручно и на естетско поле и за успеси во пропагирање на фотографијата.