Македонски: Аполоновата пеперутка спаѓа во редот на дневни пеперутки (Lepidoptera) во фамилијата (Papilionidae). Родот Parnassius е препознатлив по белузлавите крила на кои во средината имаат црвени точки кои подсеќаат на очи и е распростанет во Европа, Северна Америка, а послабо во Азија.

Ларвите од овој вид се хранат со листовите од растенија од родот Sedum и Sempervivum кои растат на стерилна карпеста подлога. Витално за опстанокот на овој вид е и присуството на планински цветни ливади, каде што се хранат адултните едники. Во Македонија, Аполоновата пеперутка е присутна само во високопланинскиот појас на планините со карбонатна подлога, додека отсуствува на планинските масиви со силикатна подлога. Во Националниот Парк Галичица присутна е над горната шумска граница на буковите шуми и високопланинските ливади и пасишта на надморска височина над 2000 метри. Аполоновата пеперутка (Parnassius apollo) е вклучена на листата на Appendix II (строго заштитени животински видови) од Бернската Конвенција. Таа е вклучена на листите на Annex IV од ЕУ Директивата за живеалишта (92/43/EEC), додека на IUCN Црвената листа на видови под закана во Европа е вклучен во категоријата “Near Threatened” (NT).

Досегашните резултати од мониторингот на Аполоновата пеперутка во Националниот Парк Галичица даваат исклучително значајни сознанија, како по однос на фреквентноста, така и по однос на абундантноста на популацијата на овој вид во Паркот. Имено, и двата параметри се неколкукратно над просечната вредност во Централна Европа. Од тие причини, територијата на Паркот може да се смета како “матично подрачје” (Core Area) за видот на Национално ниво.