Мојсеј Мурин
Преподобен Мојсеј Мурин бил родум од Египет, а по професија прво бил разбојник и водач на разбојничка дружина, а потоа бил покајник и голем подвижник.
| Мојсеј Мурин | |
|---|---|
 | |
| Роден(а) | 330, Египет |
| Починал(а) | 405, Скит, Египет |
| Слава | |
Живот уреди
Како роб на некој господар, Мојсеј побегнал и станал разбојник. Поради неговата голема телесна снага и безобзирноста, разбојниците го избрале за свој старешина. Одеднаш на него наишла грижа на совеста и покајание за неделата што ги извршил, ја оставил дружината, стапил во некој манастир и се предал потполно на послушност на својот духовник и на манастирскиот ред. Многу се користел со поуките на светите Макариј, на Арсениј и на Исидор. Подоцна се повлекол на безмолвие во една келија, каде што целиот се предал на телесен труд, молитва, бдеење и богомислие. Мачен од демонот на блудот, тој се исповедал кај духовникот Исидор и од него добил совет да пости што повеќе и да не јаде до ситост. Но кога и тоа не помогнало, тој по совет на старецот, почнал ноќе да бдее и да се моли стоејќи; потоа, вообичаено, почнал по цела ноќ да им носи вода на старците од оддалечен бунар. По шестгодишен огромен труд, најпосле св. Исидор чудотворно го исцелил од блудните помисли, фантазии и соништа наведувани на него од демонот. Во староста бил ракоположен за свештеник. Основал свој манастир и имал 75 ученици, а поживеал во овој живот 75 години. Ја провидел својата смрт и еден ден им рекол на своите ученици да бегаат, бидејќи варвари ќе удрат на манастирот. Кога учениците и него го викале да бега, тој рекол дека треба да погине од насилие, зашто и самиот некогаш правел насилие, според зборовите: сите што се фаќаат за нож, од нож ќе загинат (Мат.26:52). Па останал со 6 собраќа; варварите дошле и ги убиле. Еден од браќата бил скриен во близина и гледал, и видел 7 светли венци како се спуштиле на седумте маченици.