Милчо Коцаре

Милчо Коцаре (Охрид, 1923 - Скопје, 2002) – универзитетски професор на Факултетот за електротехника и информациски технологии.

Милчо Коцаре
Роден	1923 Охрид
Починал	2002 Скопје
Националност	Македонец
Занимање	универзитетски професор
Деца	Љупчо Коцарев

Животопис

Милчо Коцаре е роден во Охрид во 1923 година. Од 1942 година учествувал во Народноослободителното движење, а во почетокот на 1946 година бил демобилизиран за да го продолжи школувањето. Дипломирал во 1953 година на Електротехничкиот факултет во Белград. Во периодот 1953 – 1963 работел во Радиотелевизија - Скопје на должност главен инженер за високочестотна техника, а потоа во Железничкото транспортно претпријатие во Скопје како шеф на групата за телекомуникации и електроника. Во 1963 година бил избран за предавач на Техничкиот факултет во Скопје - Електротехнички отсек. Во 1967 година бил избран во звањето доцент, во 1973 година во звањето вонреден професор, а во 1979 година во звањето редовен професор

На Факултетот работел од неговото основање на функциите: шеф на Отсекот за енергетика, шеф на Катедрата за електроника, шеф на Лабораторијата за електроника и раководител на Институтот за електроника. Во управните органи ги вршел должностите: претседател на Советот на Факултетот во два мандата и претседател на Извршниот одбор. Основач е на Катедрата и Лабораторијата за електроника. Учествувал и во организирањето на постдипломските студии од областа електроника. Извршувал и повеќе општествени должности: делегат на Собранието на СР Македонија, делегат во Работничките совети на Радиотелевизија Скопје и претпријатието за ПТТ сообраќај - Скопје. Автор е на над 40 научни и стручни трудови. Бил член на Извршниот одбор на ЕТАН за Југославија, член на Редакцискиот одбор за СР Македонија - на списанието „Автоматика“, член на Комисијата за електроника и автоматика на Сојузниот совет за координација на научните дејности и други. Пензиониран е во 1987 година. Починал во 2002 година.