Васка Илиева
Васка Илиева (21 декември 1923 во Скопје - 4 мај 2001 во Скопје) — македонска пејачка, доајен на македонската народна песна и една од најпознатите македонски изведувачи на народна музика.
| Васка Илиева | |
|---|---|
 Васка Илиева на омот од албумот „Пуста младост бргу поминува“ | |
| Животописни податоци | |
| Роден(а) | 21 декември 1923 Скопје, Кралство СХС |
| Починал(а) | 4 мај 2001 (возр. 77) Скопје, Македонија |
| Жанрови | Народна |
| Занимања | пејачка |
| Инструменти | вокал |
| Период на активност | 1950 - 2001 |
Васка Илиева е родена во скопската населба Чаир на 21 декември 1923 г. во семејство на музичари. Нејзиниот татко, Тодор Бошков Велков, бил познат гајдаџија. Васка Илиева својата музичка кариера ја започнува пред 1950 г. во Државниот ансамбл за народни песни и игри „Танец“. Поради ненадминатиот стил на пеење и неповторливиот глас, Васка Илиева многу брзо станува многу популарна и настапува на безброј концерти, не само во татковинатa, туку и во тогашна Југославија, како и секаде во светот каде што живеат Македонци.
Станува препознатлива со песните: „Земјо македонска“, „Имала мајка“, „Излегол Невен Пејо“, „Аир да не сториш мајко“, „Сестра кани брата на вечера“ и многу, многу други. За време на долгата музичка кариера, во Република Македонија и насекаде по светот каде што живеат Македонци ја нарекуваа „Жива легенда“ на македонската народна песна, „Кралица на македонската народна песна“, како и „Амбасадор на македонската народна музика“.
Починала на 4 мај 2001 г. во родното Скопје на возраст од 77 години, оставајќи зад себе богато културно и духовно наследство. Во нејзина чест, а по повод 10 години од нејзината смрт, беше организиран и одржан концерт во Македонската опера и балет, на кој настапија познати музички имиња, како и нејзиниот наследник Сузана Спасовска.
Надворешни врски уреди
- Песни Архивирано на 7 јуни 2015 г.