Македонски Телеком

(Пренасочено од T-Mobile Македонија)

Македонски Телеком АД (скратливо АД Македонски телекомуникации) е најголемо трговско друштво за телекомуникации во Македонија, со седиште во Скопје. Друштвото, основано на 1 јануари 1997 година, претставува дел од Групацијата „Маѓар Телеком“ која е целосно консолидирана подружница на меѓународната групација „Дојче Телеком“ (Deutsche Telekom Group). „Македонски Телеком“ нуди широк опсег на телекомуникациски услуги и услуги од забавен карактер, како што се мобилни и фиксни телефонски услуги, опсег на услуги за интернет пристап вклучувајќи широкопојасен интернет (ADSL), IPTV производи и управува со националната телефонска мрежа. „Македонски Телеком“ е едно од најуспешните и најголемите трговски друштва во Македонија.[1]

Македонски Телеком АД
ДејностКомуникациски сервиси
Основано1 јануари 1997
СедиштеСкопје, Македонија
Опслужувани подрачја
Македонија Република Македонија
Клучни личности
Никола Љушев (Главен извршен директор)
Славко Пројкоски (Главен директор за финансии)
Мирослав Јовановиќ (Главен директор за техника и ИТ)
Бранко Станчев (Главен комерцијален директор)
Назим Буши (Претседател на одбор на директори)
Производимобилна телефонија, Фиксна телефонија, широкопојасен интернет пристап, интегрирани решенија, мрежи, IPTV оператор
Вработени
1300 (септември 2017)
Матично претпријатие
Дојче Телеком Уреди на Википодатоците
Мреж. местоhttp://www.telekom.mk

Историја

уреди

Формирање на Македонски телекомуникации

уреди

АД Македонски телекомуникации е компанија во државна сопственост, основана на 1 јануари 1997 година, како компанија независна од Поштата. Претходникот на компанијата кој обезбедувал телекомуникациски, поштенски, банкарски и други услуги во Република Македонија под називот „ПТТ Македонија“ се поделил на два нови правни субјекти: АД „Македонски телекомуникации“ и АД „Македонски пошти“, пришто првата стана Македонски Телеком на 11 години. Ова резултирало со одделување на поштенските операции од оние за телекомуникации и телеграфија, како и со одделување на релевантните средства и обврски. Во март 1998 година, компанијата се регистрирала како акционерско друштво во јавна сопственост со цел да се подготви за приватизацијата.

Приватизација

уреди

Приватизацијата се случи на 15 јануари 2001 година, кога Владата на Република Македонија и конзорциум предводен од унгарскиот давател на телекомуникациски услуги, Матав, потпишаа договор за аквизиција на акциите на Македонски телекомуникации при што Матав влезе во акционерската книга на Македонски телекомуникации како сопственик на 51 % од акциите со што стана доминантниот сопственик на компанијата. Од октомври 2008 година, македонската влада сè уште држи директен удел во акциите на компанијата. Од 1 јуни 2001 година, давателот на услуги за мобилна телефонија T-Mobile (поранешен Мобимак) почна да функционира како посебен правен субјект (ќерка компанија).

Ребрендирање

уреди

На 1 мај 2008 година, АД „Македонски Телекомуникации“ официјално станаа дел од групацијата „Дојче Телеком“, со прифаќање на новиот „Т“ бренд. Од овој датум, компанијата работи како правен субјект под името „Македонски Телеком“, акционерско друштво за електронски комуникации – Скопје или под скратениот назив, Македонски Телеком АД – Скопје. Со имплементацијата на „Т“ брендот, што ги покривало двата денес згаснати под-бренда T-Home и T- Mobile, „Македонски Телеком“ го презел корпоративниот идентитет и дизајн на групацијата „Дојче Телеком“. Под брендот „Телеком“ пласираше на пазарот серија нови производи и услуги, помеѓу коите и атрактивните Double Play и Triple Play понуди.

Консолидација и згаснување на „T-Mobile“ и „T-Home“

уреди

„Македонски Телеком“ и „T-Mobile Македонија“ од 1 јули 2015 година официјално се споиле во едно трговско друштво. Одлуката била донесена на собранието на акционерите, одржано на 17 јуни, со прифаќање на Спогодбата за присоединување. Фирмата „T-Mobile Македонија“ од 1 јули 2015 година престанала да постои како правно лице, а сите вработени, како и целокупниот имот и обврски биле преземени од „Македонски Телеком“. Од овој датум, мобилниот оператор работи како правен субјект под името „Македонски Телеком“, акционерско друштво за електронски комуникации – Скопје или под скратениот назив, Македонски Телеком АД – Скопје. На 3 септември 2015 година, „Македонски Телеком“ најавил дека ги згаснал двата продуктни бренда „Т-Home“ и „T-Mobile“ и вовел еден бренд - „Телеком“ кој продолжил да го применувал сите комуникациски услуги за дома и во движење: мобилните и фиксните интегрирани услуги, решенијата за деловни корисници, па дури и Cloud-решенијата.[2][3]

Работење и услуги

уреди

„Македонски Телеком“ е оператор на мобилни и фиксни линии на македонскиот пазар, работи и како давател на интернет услуги и како давател на интегрирани телекомуникациски и телевизиски услуги. Со понуда на комуникациски услуги и забавна содржина се осигуруваат приходите во иднина, компанијата ја подобрува и конкурентноста во Македонија, како и порастот на мобилните и широкопојасните услуги на национално ниво.[4] Компанијата нуди портфолио на услуги што се засноваат на Интернет-протокол, услуги за комуникација на податоци, продажба и изнајмување на опрема и услуги за системска интеграција.

Мобилна телефонија

уреди

Telekom.mk е првиот GSM мобилен оператор во Македонија. Компанијата е активна од септември 1996 година, под тогашниот назив МобиМак пред да биде купена од Дојче Телеком. Во 2006 година, „МобиМак“ станал дел од Т-Mobile а во 2015 година го променил називот во Telekom.mk, синхронизирајќи ја работата со останатите фирми ќерки на „Дојче Телеком“. Мрежата на „Телеком“ покрива речиси 100% од населението и преку речиси 100% од територијата на Македонија. Компанијата прва ги претставила GPRS. EDGE, 3G и 4G LTE мрежите на македонскиот пазар.

На 28 Март 2024 година,Македонски Телеком преку нивните социјални мрежи најавија дека до крај на Април 2024 година 3G мрежата ќе биде исклучена со цел да се искористи потенцијалот за подобра поврзаност,поголеми брзини,поквлалитетна услуга за корисниците и подобра енергетска ефикасност.[5]

Фиксна телефонија

уреди

Компанијата обезбедува услуги на фиксна телефонија претежно преку VoIP и нуди различни тарифни планови. Во првиот квартал на 2017 година, со 214.000 корисници, „Македонски Телеком“ имал пазарно учество од 59,1% во областа на фиксната телефонија во Македонија.[6]

Интернет

уреди

Телеком нуди портфолио од интернет-протокол засновани сервиси, комуникациски мрежи, опрема за продавање и изнајмување како и системски интегрирани сервиси. Телеком се стреми да ја модернизира мрежата и да постигне високо технолошко ниво. Еден од главните фокуси е модернизација на оптичката мрежа позната како fiber-to-the-home (FTTH). Во ноември 2011 Телеком започна проект за модернизација на мрежата преку нова интернет-заснована мултимедијална платформа. Платформата се употребува за VoIP и миграција од PSTN кон целосна IP мрежа. Денес над 290.000 фиксни линии се мигрирани кон новата платформа.[7] Во првиот квартал од 2017 година, Македонски Телеком имал 189.000 претплатници на широкопојасен интернет, со што заземал пазарно учество од 47,25 во Македонија.[6]

IPTV услугата на „Македонски Телеком“ започнала со работа на 1 ноември 2008 под брендот MaxTV како прва понуда за дигитална телевизија во Македонија. MaxTV нуди +150 тв канали и интерактивни услуги преку IPTV платформата. „MaxTV“ се употребува во близу 100.000 домаќинства.

Портали

уреди

Првиот портал, дизајниран од страна на МТнет (поранешниот давател на интернет услуги на Македонски Телеком), беше пуштен во употреба на 7 декември 1999 година. Во тоа време, тоа била комбинација на портфолиото на веб производи на МТнет и општ портал за Интернет содржина. Тоа бил првиот портал од таков вид, и нудеше скоро дневно ажурирани новости и информации на интернет корисниците во Македонија.

ИДИВИДИ (www.idividi.com.mk), бил пуштен во употреба во февруари 2004 година за воведување нови видови на содржини и додавање функционалности поврзани со издавање на содржини и интеракција со посетителите. Темите вклучуваат: вести од светот и од земјата, деловни информации, спорт, стил, забава, здравје, технологија. До 2008 година, ИДИВИДИ имал просечно 35 илјади посетители и имал највисок број од 60 илјади посетители во еден ден. ИДИВИДИ објавува 200 нови написи во ден. Порталот ги нуди и следните услуги: Речник за десет различни јазици; Лични огласи; Електронски честитки; услуги за Online chatting; Форум заедница; Преземање на софтвер од различни категории; Online образовни курсеви (едукација); Услуги за дневни информации; Вести од дневните весници и електронските медиуми (ИДИВИДИ медиуми); 24 часа камери во живо.

Под доменот на ИДИВИДИ постојат неколку други портали: Мултимедијален портал (Мултибокс); Портал за содржина генериран од корисниците (Мое Видео); Портал за заедницата за online игри (МаксАрена).

Со воведувањето на IPTV производите во ноември 2008 година, се воведе и MaxTV порталот (www.maxtv.mk).

Организација и менаџмент

уреди

На 1 мај 2017 година, за главен извршен директор на „Македонски Телеком“ бил назначен Андреас Елснер. Во јули 2018 година, за главен извршен директор бил назначен Никола Љушев.[8]

Општествена одговорност

уреди

Македонскиот Телеком е основач на Фондацијата „Телеком за Македонија“ чиј претседател е Никола Љушев. Во 2019 година, оваа фондација воспоставила партнерство со УНИЦЕФ кое се однесува на две иницијатици за помош на децата и младинците со попреченост во развојот.[9]

Награди и признанија

уреди

Во 2016 година, на Светскиот конгрес за информатичка технологија, одржан во Бразилија, „Македонски Телеком“ добил награда од Светската алијанса за информатичка технологија и услуги (WITSA) за проектот „Паметен град“ (Smart City), во категоријата „Решение за одржлив раст“.[10]

Наводи

уреди
  1. Најголеми фирми во Македонија
  2. telekom.mk
  3. „Т-Мобиле и Т-Хоме влегуваат под една капа - Телеком“, Економија и бизнис, година 18, број 207, 11 септември 2015, стр. 10.
  4. Оптички кабел до дома
  5. " Збогум 3G. LTE и 5G за секого.
  6. 6,0 6,1 Мирослав Саздовски, „Македонски Телеком ја задржа водечката позиција на пазарот и во 2017 година“, Економија и бизнис, година 19, број 228, јуни 2017, стр. 12.
  7. „MakTel completes IP migration“. Архивирано од изворникот на 2014-02-22. Посетено на 2015-09-08.
  8. Мирослав Саздовски, „Никола Љушев, нов главен извршен директор на Македонски Телеком“, Економија и бизнис, година 20, број 241, јули/август 2018, стр. 8.
  9. Мирослав Саздовски, „Партнерство на УНИЦЕФ и Фондацијата Телеком за Македонија“, Економија и бизнис, година 20, број 252, јули/август 2019, стр. 6.
  10. „Македонски Телеком доби награда за проектот Паметен град“, Економија и бизнис, година 18, број 221, ноември 2016, стр. 10.

Надворешни врски

уреди