Ристо Лазаров

Ристо Лазаров, роден на 3 октомври 1949 година во Штип, НР Македонија. Дипломирал југословенска книжевност со македонски јазик на Филолошкиот факултет „Блаже Конески“ при Универзитетот „Св. Кирил и Методиј“ во Скопје. Пишува поезија, театарска и литературна критика. Живее и работи како новинар во Скопје.

Творештво

Ги објавил следниве одделни книги поезија:

• „Ноќна птица во паркот“ (1972),
• „Јана“ (1980),
• „Гроџен кикот“ (1983),
• „Капки кисела вистина“ (1985),
• „Лето преку океанот“ (1988),
• „Горјан во Дорјан“ (1988),
• „Точка на вриење“ (1990),
• „Од Битола појдов“(1993),
• „Одвајнадежна“ (1993),
• „Силјан штркот уште еднаш ја облетува Македонија“ (1995),
• „Херакле“ (1998),
• „Колумбо“ (2000),
• „Тројца за преферанс“ (2001),
• „Одмолчена“ (2003),
• „Ненадејна“ (2005),
• „Чехопек“ (2006),
• „Среде“ (2008),
• „Сонот на коалата“ (2009),
• „Кревалка“ (2011),
• „Ситночекорка“ (2012),
• „Светилничар“ (2013).

Објавил и три избора од поезијата на македонски јазик: „Одрони“ (1988), „Јаве“ (1998) и „Жива рана“ (2008). Неговите книги се преведени на албански, англиски, бугарски, руски, словенечки, српски и чешки јазик.

Награди и признанија

Ристо Лазаров е добитник е на следните награди во областа на литературното творештво:

• „Млад борец“ (1972): за стихозбирката „Ноќна птица во паркот“
• „8 Ноември“ (1972): доделена од градот Штип за стихозбирката „Ноќна птица во паркот“
• „13 Ноември“ (1980): доделена од градот Скопје за стихозбирката „Јана“
• Прва награда за песна на „Празникот на липите“ (2000)
• „Ацо Шопов“ : доделена во 2007 година од Друштвото на писателите на Македонија за стихозбирката „Чехопек“, објавена во 2006 год.
• „Книжевен жезол“ (2010)
• „Велја кутија“ (2010): на манифестацијата „Македонски духовни конаци“
• „Дијалог“ (2012)
• „Браќа Миладиновци“: доделена од Струшките вечери на поезијата за стихозбирката „Среде“ како најдобра книга поезија од македонски автор
• Награда „11 Октомври“ за животно дело од областа на културата и уметноста (2018)

Во областа на новинарството ги добил врвните државни награди „Мито Хаџи Василев - Јасмин“ (1975) и „Крсте Мисирков“ (1982).

Професионален ангажман

Ристо Лазаров е застапуван во повеќе антологии на македонската и југословенската поезија. Член е на Друштвото на писателите на Македонија и на Македонскиот ПЕН центар. Од 2006 година е претседател на Македонскиот ПЕН центар. Бил генерален директор на југословенската новинска агенција „Танјуг“. Бил директор и главен уредник на Телевизија Телма.

Надворешни врски

• Мрежно место на Ристо Лазаров