Добриот војник Швејк (филм)

„Добриот војник Швејк“ (чешки DOBRÝ VOJÁK ŠVEJK) е чехословачки филм од 1956 година, во режија на Карел Стекли, кој е автор и на сценариото, засновано врз сатиричниот роман на Јарослав Хашек од 1923 година, „Доживувањата на добриот војник Швејк во светската војна“. Главните улоги ги играат: Рудолф Хрушински, Франтишек Филиповски, Сватоплук Бенеш, Божена Хавличкова и Ева Свободова. Во 1957 година, на филмскиот фестивал во Карлови Вари, режисерот Стекли бил номиниран за наградата „Кристален глобус“.

Содржина

Госпоѓата Милерова (ја игра Свободова) го известува потстанарот Швејк (го игра Хрушински) дека е убиен престолонаследникот Франц Фердинанд. Швејк оди во пивницата, каде полицискиот агент го намавува да зборува за политиката, со намера него и сопственикот на пивницата да ги уапси поради велепредавство. Потоа, Швејк го испитуваат полицајците и психијатрите, по што го ослободуваат сметајќи го за глупав. Сепак, наспроти болките во нозете, Швејк се пријавува во војската...